تربيه حواري الفصل الثالث عشر 13

رواية تربية حواري الفصل الثالث عشر 13
حور اتخضت وردت بسرعه_ ايوه يابني في إيه
سبارس_ خير يا اسطى كنت عايز أبلغ تيجي بكره ضروري العربيه فيها حاجه مش معصلجه ومش عارف اعملها .
حور بتنهيده_ ماشي يا سبارس بكره انا جايه ان شاء الله
سبارس_ ماشي يا اسطي مستنيكي مع السلامه
حور _ ماشي يا سبارس مع السلامه
وقفلت وقامت غيرت هدومها وصلت العشاء اللي اتأخرت ودعت ربنا انه ينور بصيرتها للصح

اللهم بحولك لا بحولي وبقوتك لا بقوتي اللهم ان كان خير فقربه وإن كان شړا فأبعده فإنك تعلم ولا أعلم فإنك تقدر ولا أقدر فإنك ارحم الراحمين ومجيب السائلين يااااارب
وقامت بهدوء شغلن الموبايل على سوره البقره ونامت
تاني يوم حور قامت واتوضت وصلت وغيرت
هدي بفرحه_ ها يا ضنايا مش احسن انهارده
حور بهزه رأس_ ايوه الحمد لله
هدي بضحكه_ والنبي يابت يا حور
انتي مبخته دانا انهارده وانا بجيب الفطار الشارع كله بيحسدنا على النسب اللي يشرف شاب طول بعرض اللهم بارك لا وكمان ايه اهله ناس عليوي ومقتدرين
حور _يا أما يعني احنا شحاتين محڼا الحمد لله عندنا اللي يكفينا ويزيد مليون مره يعني الحمد لله ربنا فايض بخيره لو وافقت عشان هو دخل البيت من بابه وواضح انه جدع وابن أصول مع لني بحسه عيل طري وأمه مأثره عليه
هدي بلويه وشه ومعجبهاش الكلام_ يابت بطلي تطلعي القطط الفاطسه فيه مهو لو مكانش حنين على أمه عمره ما هايكون حنين عليك والراجل متعبوش غير جيبه يا خايبه
حور بعدم اقتناع_ لا يا هدي يعيبه رجولته واخلاقه يعيبه اسلوبه وحياتك يعيبه قبل داه كله دينه واخلاقه يا أما اللي يدور على الراجل اللي ميعبوش غير جيبه داه الجيعان اللي بيدور على القرش والأكل واللي زي داه عمره ما يشبع ولا يملى عينه حاجه اصل عينه من الأساس فارغه
هدي بعوجه بوق_ بلا كلام فاضي يلا يلا روحي شوفي اللي وراكي واعملي حسابك الخميس والجمعه ورانا هم ما يتلم
حور بنفخه_ اووو ف حاضر يلا فوتك بعافيه
هدي_ الله يعافيك
طلعت حور وردت الباب الحديد وراها ولسه هاتركب عربيتها لقيت جبل في وشها بإبتسامه مبينه كل اسنانه
جبل بفرحه_ صباح الفل يا حور
حور وهي بتحاول ترسم ابتسامه_ صباح الخير يا جبل ايه لسه مروحتش شغلك
جبل برومانسيه_ لا منا مبقيتش اعرف ابداء يومي من غير ما أصبح عليكي وأشوفك شكلها هاتبقى إدمان
حور بخجل_ يلا ربنا معاك مع السلامه
مشيت حور وعين جبل متبعاها لحد ما اتحركت بالعربيه وركب عربيته واتحرك وهي بيضحك ومبسوط ان حوريته بقت خلاص قاب قوسين انها تكون ملكه
وصلت حور الشغل ونزلت
الكل بيبارك الخبر سمع في كل مكان
حور بإبتسامه _ الله يبارك فيكم وطبعا كلكم معزومين على كتب الكتاب
الكل في صوت واحد_ طبعا يا اسطى